Қаулы 2024 жылғы 30 шілдеден бастап күшіне енеді.
2024 жылғы 5 шілдедегі Ұлттық банктің қаулысымен ҚР ұлттық валютасының банкноттары мен монеталарының төлемділігін анықтау қағидаларына өзгерістер мен толықтырулар енгізілді, деп хабарлайды Almaty-akshamy.kz
Құжатқа сәйкес, келесі зақымдары бар банкноттар ескірген болып саналады:
Бояғыш заттармен боялған;
Бөгде жазулары бар, соның ішінде:
Ультракүлгін сәулемен көрінетін арнайы химиялық ұнтақпен өңделген;
Машинамен оқылатын белгілерді жауып тұрған;
Жыртылған банкноттар, желімделген немесе желімделмеген бөліктері сөзсіз бір банкнотқа тиесілі және бірге Ұлттық банк белгілеген банкнот өлшемінің кемінде 70% құрайтын;
Бұрышынан немесе шетінен ауданының 1%-дан астамын жоғалтқан, бірақ Ұлттық банк белгілеген банкнот өлшемінің кемінде 70% сақтаған;
Жыртықтары бар, мөлдір жабысқақ таспамен желімделген;
Диаметрі 3 мм және одан да көп тесіктері, ойықтары бар, банкноттағы тесіктердің болуы оның өтелгенін көрсететін жағдайларды қоспағанда;
Банкнот бейнесінің жоғалуына әкелген үйкелістері бар;
Күйген және күйдірілген, бірақ Ұлттық банк белгілеген банкнот өлшемінің кемінде 70% сақтаған;
Беткі немесе артқы жағының ластануы бар, бұл банкноттың бейнесі мен жарықтығының төмендеуіне әкелген. Ластану деп шаңның, кірдің, майлардың және басқа да ластаушы заттардың болуы салдарынан банкнот бетінің қараюымен сипатталатын банкноттардың жағдайы түсініледі;
Қағазы борпылдаған және қаттылығын жоғалтқан;
Банкноттарды сақтау және қауіпсіз тасымалдау құрылғыларында қолданылатын арнайы бояулармен боялған.
Ұлттық банк белгілеген өлшемнің 50% және одан да көп пайызын жоғалтқан банкноттар, "ҮЛГІ", "ОБРАЗЕЦ", "SPECIMEN", "МУЛЯЖ" деген жазуы бар банкноттар, сондай-ақ шынайы банкноттардың фрагменттері бар және кесілген банкноттар төлем қабілеті жоқ деп саналады.