Бүгін Алматыда «WorldSkills Almaty – 2026» XI өңірлік кәсіби шеберлік чемпионатының екінші жарыс күні өтіп жатыр. Алматы қаласы әкімдігінің қолдауымен қалалық Білім басқармасы ұйымдастырған үш күндік турнир 25 наурызда «Атакент» ҚІЫО аумағындағы №11 павильонда, сондай-ақ қала колледждерінің базасында басталды, – деп хабарлайды aqshamnews.kz тілшісі.
Чемпионатқа 470-тен астам колледж студенті қатысуда. Олар 7 бағытқа біріктірілген 57 құзыреттілік бойынша сынға түсіп жатыр. Байқау жұмыстарын 500-ден астам сертификатталған сарапшы бағалап отыр, олардың үштен бірі жұмыс беруші кәсіпорындардың өкілдері.
Жарыстың екінші күні Алматы қаласы әкімінің орынбасары Абзал Нүкенов қатысты. Ол сайыстың өту барысымен танысып, қатысушылармен және сарапшылармен әңгімелесті. Сондай-ақ, студенттердің құрылыс, ақпараттық технология, дизайн және өзге де бағыттар бойынша шеберліктерін көрсетіп жатқан алаңдарды аралады.
Ертең, 27 наурызда, жарыстың соңғы күні өтеді. Чемпионатты салтанатты түрде қорытындылау және жабылу рәсімі 30 наурыз күні сағат 15:00-де Оқушылар сарайының акт залында (Достық даңғылы, 114) ұйымдастырылады. Жеңімпаздар қараша айында Астанада өтетін WorldSkills Kazakhstan 2026 республикалық кезеңінде Алматы қаласының намысын қорғайды.
Чемпионат Мемлекет басшысы жариялаған Жасанды интеллект және цифрландыру жылы аясында өтіп, жұмысшы мамандықтарды дәріптеуге және адами капиталды дамытуға ықпал етеді.