Алматыда бүгін ауа райы жанға жайлы, бейне қыс ортасында көктемнің жылы лебі келгендей. Соған сай қала тұрғындарының көңіл-күйі де көтеріңкі, жаңа жылды осы жылы леппен қарсы алғысы келеді. Көшелерде мерекелік қарбалас, тұрғындардың жүзінде қуаныш пен шаттық айқын байқалады.
Бүгін қаланың басты мерекелік шарасы – Жаңа жылға арналған үлкен концерт «Астана» алаңында өтеді. Қазіргі уақытта алаңда сахна толық орнатылып, техникалық және шығармашылық дайындық жұмыстары тәмамдалған. Кешкілік қала тұрғындары мен қонақтарын әсерлі концерттік бағдарлама күтіп тұр.
Мерекенің қауіпсіз әрі көңілді өтуі үшін барлық қажетті шаралар қарастырылған. Алаң маңында коммуналдық қызметтер, полиция және Төтенше жағдайлар қызметінің мамандары жұмылдырылып, қоғамдық тәртіп пен қауіпсіздік бақылауда болады.
Алматы жаңа жылды бірге, бір көңілмен қарсы алуға дайын. Жылы атмосфера, әсем музыка мен мерекелік көңіл күй – бүгін «Астана» алаңында!