Алматыда Тәжікстан Республикасының Хатлон облысынан келген фермерлердің ауылшаруашылық жәрмеңкесі өтіп жатыр, деп хабарлайды aqshamnews.kz
Іс-шара Қала күніне орай ұйымдастырылған.
Алматы әкімі Дархан Сатыбалды жәрмеңкеде ұсынылған өнімдермен танысып, өндірушілер және келушілермен сөйлесті. Онымен бірге Хатлон облысының төрағасы Саид Давлатали де жәрмеңкеге қатысты. Бұған дейін олар ресми кездесу өткізіп, Алматы мен Хатлон облысы арасындағы ынтымақтастықтың болашағын, соның ішінде сауда-экономикалық байланыстарды дамыту мәселелерін талқылаған болатын.
Жәрмеңкеге Хатлон облысынан 40 фермер қатысып, 200 тоннадан астам жаңа өнім әкелді. Қала тұрғындары үшін көкөністердің, жемістердің, табиғи құрғақ жемістер мен шығыс тәттілерінің кең таңдауы ұсынылған. Барлық тауарлар тікелей өндірушілерден жеткізіліп, жоғары сапа мен қолжетімді баға қамтамасыз етілуде.
Жәрмеңке Қазақстан мен Тәжікстан арасындағы сауда-экономикалық ынтымақтастықты нығайтуға бағытталған. Алдағы уақытта құрғақ жемістер мен ерте пісетін жеміс-көкөністерді Алматы нарығына маусымаралық кезеңде тікелей жеткізу жоспарланып отыр.
Айта кетейік, жәрмеңке 20–21 қыркүйек күндері Алатау ауданындағы «Алатау» театрының алдындағы алаңда, Момышұлы мен Универсиада көшелерінің қиылысында өтеді.