Алматыны қоғамдық көлікпен қамтамасыз етіп отырған компаниялардың бірі – «Алматыэлектротранс» ЖШС-ы автобустардың техникалық қызмет көрсетуіне байланысты жаңа пилоттық жобаны іске асыруда.
«Алматыэлектротранс» автобустарына зауыттың мамандары техникалық және сервистік қызмет көрсетеді. Өндіруші зауыт пен алматылық компания арасында аутсорсингтік қызметке келісім жасалды. «Алматыэлектротранс» мәліметінше, пилоттық жобаның қолға алынуына келесі себептер негіз болған:
– Мемлекеттік сатып алу жүйесі бағасы ең төмен қызметті не жабдықты қабылдайды. Бұл өз кезегінде автобусқа алынған жабдықтардың сапалы болуына кепіл бермейді. Сондықтан қоғамдық көліктер тезірек тозып, жиі жөндеу жұмыстары істеледі.
– Тендер өткізу көп уақыт алады. Сондықтан жөндеу жұмыстары тез істеле қоймайды, ол өз кезегінде қалалық бағыттардағы автобустардың жиілігін азайтады.
– Тендер арқылы қажетті жабдықтар алынып, компания өз күшімен жөндеу жұмыстарын істеген кезде бұл жұмыстарға кепілдік берілмейді.
«Алматыэлектротранс» ЖШС бас директорының техникалық сұрақтар бойынша орынбасары Айдар Ешпановтың айтуынша, аутсорсинг арқылы техникалық қызмет көрсету – жоғары білікті мамандарға және заманауи әдістерге қол жеткізуге мүмкіндік береді, сондай-ақ сапалы қосалқы бөлшектердің алынуын қамтамасыз етеді. Оған қоса, аутсорсинг арқылы істелген жұмыстарға кепіл беріледі.