Алматыда әйгілі актер Джеки Чанның жүргені жайлы ақпарат әлеуметтік желіде қызу талқыланып жатыр, деп хабарлайды Аqshamnews.kz тілшісі.
23 қыркүйекте түсірілген фото мен бейнежазбаларда Джеки Чанға ұқсайтын адам Алматы халықаралық әуежайында байқалған. Желі қолданушылары актерді Salem Entertainment компаниясының өкілдерімен бірге көріп қалғанын айтады. Содан бері оның келу себебі жайлы түрлі болжам жасалып жатыр.
Ең кең тараған нұсқалардың бірі - Джеки Чан Қазақстанға жаңа фильмнің түсірілімі үшін келген болуы мүмкін. Кейбір пікірлерге сүйенсек, ол қазақстандық медиакомпания Salem Entertainment-пен ірі халықаралық жобада серіктес болуы ықтимал. Тағы бір нұсқа бойынша, актер алдағы уақытта өтетін "Қайрат" пен "Реал Мадрид" арасындағы матчінің құрметті қонағы болуы мүмкін деген жорамалдар айтылып жатыр.
Алайда әзірге бұл ақпаратқа қатысты ресми растау жоқ. Salem Entertainment компаниясы да, футбол клубтарының өкілдері де ешқандай пікір білдірмеді. Алматы әкімдігі мен мәдениет мекемелері тарапынан да ресми түсініктеме берілген жоқ.
Айта кетейік, бұған дейін Salem Entertainment компаниясының бас директоры Игорь Цай Қазақстанда халықаралық киножобалар жүзеге асырылып жатқанын, соның ішінде Джеки Чан және америкалық продюсерлермен бірлескен жұмыстар бар екенін мәлімдеген еді. Оның сөзінше, компания жыл сайын ондаған сериал мен бірнеше толықметражды фильм түсіреді және шетелдік серіктестермен байланысын кеңейтіп жатыр.
Дегенмен дәл қазір Джеки Чанның Алматыға келуінің нақты мақсаты белгісіз. Ақпаратты ешбір ресми дереккөз растамағандықтан, әлеуметтік желідегі болжамдар әзірге тек қауесет күйінде қалып отыр.