Экономикалық және сыбайлас жемқорлыққа қарсы күрес агенттігінің бұрынғы төрағасы Қайрат Қожамжаровқа қатысты сотқа дейінгі тергеу басталды, деп хабарлайды Aqshamnews.kz Бас прокуратураға сілтеме жасап.
Ведомствоның мәліметінше, тергеу оның түрлі басшылық қызметтер атқарған кезеңдерінде қызметтік өкілеттігін асыра пайдалану және қылмыстық жолмен алынған қаражатты заңдастыру деректері бойынша жүргізіліп жатыр.
"Барлық қылмыстық іс бойынша арнайы прокурорлардың басшылығымен жедел-тергеу топтары құрылды. Қылмыстық-процестік кодекстің 201-бабына сәйкес, өзге мәліметтер жария етілмейді", – делінген Бас прокуратураның хабарламасында.
Айта кетейік, Қайрат Қожамжаров – бұрынғы Ұлттық бюроның төрағасы, одан бөлек Мемлекеттік қызмет істері және сыбайлас жемқорлыққа қарсы іс-қимыл агенттігін басқарған. Ол қаржы полициясының генерал-майоры, Ақмола облысының әкімі және Қазақстанның Қауіпсіздік кеңесінің хатшысы қызметін атқарған.