Алматыда «Қайрат» пен «Реал» арасындағы тарихи матч аяқталды. Ойын нәтижесі бойынша испандықтар ірі есеппен жеңді, деп хабарлайды Aqshamnews.kz тілшісі.
Алматыда UEFA Чемпиондар лигасының жалпы кезеңіндегі тарихи кездесу өтті. Жергілікті «Қайрат» әйгілі мадридтік «Реалға» қарсы алғаш рет өз алаңында ойнап, 0:5 есебімен жеңіліп қалды.
Матч екінші тур аясында өтті. Ойынның алғашқы минуттарынан-ақ қос команданың басты жұлдыздары алаңға шықты: Килиан Мбаппе, Винисиус Жуниор, Дастан Сәтпаев пен Шерхан Қалмұрза.
Алғашқы тайм - Мбаппенің пенальтиі
25-минутта француз шабуылшысы Килиан Мбаппе пенальтиден есеп ашты. Осылайша бірінші тайм «Реалдың» пайдасына 0:1 есебімен аяқталды.
Екінші таймда «Реал» қарқынын күшейтті
Үзілістен кейін мадридтіктер толық басымдыққа ие болды. 52 және 74-минуттарда тағы да Мбаппе мергендігімен көзге түсіп, хет-трик жасады - 0:3. Осы аралықта «Қайратқа» пенальти белгіленген еді, бірақ VAR шешімінен кейін төреші айып добын алып тастады.
Жергілікті команданың бас бапкері Рафаэль Уразбахтин ойын барысын өзгерту үшін бірнеше алмастыру жасады. Байбек, Эдмилсон, Станоев, Рикардиньо және жарақаттан кейін алаңға алғаш шыққан Зария ойынды күшейтуге тырысты. Дегенмен өзгерістер нәтиже бермеді.
83-минутта Эдуардо Камавинга төртінші голды соқты. Қосымша уақытта Браим Диас нүкте қойып, есепті 0:5-ке жеткізді.
Тарихи кездесу
Бұл матч мадридтік «Реалдың» Қазақстандағы алғашқы ойыны болды. Ал «Қайрат» үшін Еуропаның ең титулды клубымен өз алаңында алғаш рет кездесудің өзі үлкен оқиғаға айналды.
Дегенмен ойын барысында қазақстандық жанкүйерлер онлайн-трансляция сапасына наразылық білдірді.
суреттер: Самат Құсайынов