Бұл сұраққа Экология министрлігінің Орман шаруашылығы және жануарлар дүниесі комитеті төрағасының орынбасары Мақсат Елемесов жауап берді, деп хабарлайды aqshamnews.kz
Комитет басшысының орынбасарының айтуынша, бүгінде Қазақстанда өрт қаупінің жоғары, бесінші класы орнаған. Ауа температурасы 35 градустан жоғары, жауын-шашын жоқ, сол себепті Мақсат Елемесовтің айтуынша, "орман қорының бүкіл аумағы қауіп аймағында".
"Ең үлкен қауіп – қылқан жапырақты ормандарда. Қарағайлы ормандарда ең алдымен орманның үстіңгі бөлігіне өрт таралу қаупі жоғары. Солтүстік Қазақстан облысындағы жапырақты ормандарда қайың ағаштарының арасында да өрт басталып жатыр, бірақ ол жерде жоғары өрт болмайды, төменгі өрт аса үлкен қауіп тудырмайды", – деп түсіндірді Мақсат Елемесов.
Қарағайлы, қылқан жапырақты ормандарда өрт шыққан жағдайда, жоғарыға таралу қаупі бар, бұл ормандардың жойылуына әкелуі мүмкін.
"Қауіп аймағында шамамен жеті облыс бар: Шығыс Қазақстан, Абай облысы, Павлодар, Қостанай, Ақмола, Алматы және Қарағанды облыстары. Бұл – қарағайлы ормандар мен орман алқаптары бар өңірлер", – деп қосты Елемесов.