Футбол тақырыбы елімізде осы апта Тредс желісін жаулап алды. Чемпиондар лигасының жалпы кезеңіне шыққан алматылық "Қайрат" ФК айды аспанға бір-ақ шығарды. Ал желідегі жұрт жағымды жаңалық аясында түрлі әзіл-қалжыңдарын жарыса жазып жатыр. Сонымен, кезекті тредстегі трендтерден не хабар? Аqshamnews.kz тілшісі тізді.
Қаһарманға айналған Анарбеков
Алматылық «Қайрат» Глазгоның «Селтикін» жеңіп, Чемпиондар лигасына жолдама алды. Қазақстандық қақпашы Темірлан Анарбеков Орталық стадионда өткен кездесудің жұлдызына айналды. Желіде оны оқ өткізбес қамалға теңеп, түрлі мемдер тарап, әзілдер де айтылып жатыр.
Қазақстандықтар Темірланға не сыйлап жатыр?
120 минут бойы қос команда бір-бірінің қақпасынан саңылау таба алмай, "футбол лотереясына", яғни пенальти сериясына жетті. 21 жастағы «Қайрат» қақпашысы Темірлан Анарбеков "Селтик" ойыншыларының үш соққысын қайтарып, "Қайратты" кәрі құрлықтағы ең беделді футбол лигасына алып шығып, сенсация жасады. Жұрт "қаһарманға" айналған Темірланның шеберлігіне риза болып, сыйлықтарын жаудырды.
3 мыңнан – 160 мың оқырманға дейін
Анарбековтың Instagram желісіндегі парақшасында тарихи матчтан кейін бір күнде 150 мыңнан астам жазылушы жиналды. Дәл қазір оқырмандарының саны – 160 мыңға жетті.
