Алматыдағы тұрғын үй кешендерінің бірінде мектеп оқушысы мысыққа қорлық көрсеткен видео әлеуметтік желіде тарады. Полиция оқиғаның мән-жайын анықтап, кәмелетке толмағанның заңды өкіліне әкімшілік іс қозғады, – деп хабарлайды aqshamnews.kz тілшісі.
Алматыда әлеуметтік желіде тараған жан түршігерлік видеоға байланысты полиция тексеріс жүргізді. Кадрларда мектеп жасындағы баланың мысыққа қатыгездік көрсеткені байқалады.
Қалалық полиция департаментінің мәліметінше, оқиға Түрксіб ауданындағы тұрғын үй кешендерінің бірінде болған. Тексеру барысында кәмелетке толмағанның жеке басы анықталған.
Осыдан кейін баланың заңды өкіліне тәрбиелеу міндеттерін тиісінше орындамағаны үшін әкімшілік хаттама толтырылды. Ал жасөспірімнің өзі профилактикалық есепке алынып, оның отбасымен түсіндіру жұмыстары жүргізілген.
Полиция жануарларға қатыгездік көрсетуге жол берілмейтінін еске салды. Сондай-ақ мұндай әрекеттер үшін Қазақстан заңнамасына сәйкес жауапкершілік қарастырылғанын хабарлады.