Былтыр Қазақстанда заңсыз ұтыс ойындарын ұйымдастырған 121 адам әкімшілік жауапкершілікке тартылып, айыппұл төлеген. Олардың арасында әлеуметтік желіде лотерея ойнатқан танымал блогерлер де бар, деп хабарлайды Аqshamnews.kz тілшісі.
Туризм және спорт министрлігінің Ойын бизнесін және лотереяны реттеу комитеті әлеуметтік желілер мен онлайн-платформаларды тұрақты түрде бақылап отыратынын мәлімдеді. Ведомствоның хабарлауынша, мониторинг нәтижелері және азаматтардан түскен өтініштер негізінде 2025 жылы 121 адам Әкімшілік құқықбұзушылық туралы кодекстің 445-1-бабы 6-бөлігі бойынша жауапқа тартылған.
Министрлік заңсыз ұтыс ойындарын өткізген аккаунттардың тізімі ресми сайтта жарияланғанын атап өтті. Аталған тізімде «Супермамасита» лақап атымен танымал Әлия Байтуғаева, блогер Мереке Қалбаева, Тұрсынбек Қабатовтың бұрынғы жұбайы Мөлдір Мұқанова, Justking31 атымен белгілі Нұрбек Нұртаза және оның жұбайы, блогер Дархан Жолшыбеков және өзге де тұлғалар бар.
Еске сала кетейік, ӘҚБтК-нің 445-1-бабы 6 және 7-бөліктеріне сәйкес, лотерея операторы болып табылмайтын тұлға лотерея өткізсе, жеке тұлғаларға 100 АЕК, ал шағын кәсіпкерлік субъектілеріне (ЖК) 300 АЕК айыппұл салынады. Егер бұл құқықбұзушылық бір жыл ішінде қайталанса, жеке тұлғалар 200 АЕК, ал шағын кәсіпкерлік субъектілері 750 АЕК төлейді. Сонымен бірге лотереядан түскен табыс тәркіленеді.