Бұл сұрақты көпшілік жиі қояды, әсіресе соңғы уақытта желіде тараған жазбалар мен ақпараттардан кейін. Әсіресе, біреудің қарызы үшін өзіңіздің немесе туысыңыздың үйіне арест қойылатынын естігендер үшін бұл мәселе маңызды болып отыр, деп хабарлайды aqshamnews.kz
Таяуда Мақсұт Таңжарықұлының әлеуметтік желіде жариялаған жазбасы қоғамда үлкен талқыға түсті. Ол өзінің үйінде «пропискада» тұрған адам қарызын өтемесе, үйіне арест қойылатынын айтады. Мұндай сөздер, әрине, үрей туғызады. Алайда, бұл ақпарат шындыққа жанаспайды.
Ұлттық коллекторлар палатасының бұрынғы төрағасы, қазіргі ҚР Микроқаржы омбудсманы Назгүл Естеусізова бұл жағдайды толық теріске шығарады. Оның айтуынша, «сот орындаушы» ретінде хабарласқан адам заңды әрекет жасамайды. Атап айтқанда, бұл жағдайда сот орындаушысы емес, коллекторлық компанияның өкілі болуы мүмкін, өйткені қарызды өндіріп алу бойынша олар кейде қарыз алушыларды қорқытып-үркітуге тырысады.
Назгүл Естеусізова заңды тұрғыдан түсінік беріп, үйіңізде тіркеуде тұрған адамның қарызы үшін баспананы арестке қою мүмкін емес екенін айтады. Сондықтан, егер сізге қарыз туралы осындай қорқыту хабарламалары келсе, бұл заңбұзушылыққа жатады. Мұндай жағдайда сөйлесудің дәлелін сақтау үшін әңгімелерді аудио немесе видео арқылы тіркеп, Қаржы нарығын реттеу және дамыту агенттігіне шағымдануға болады. Бұл агенттік тексеріс жүргізіп, егер заңбұзушылық анықталса, тиісті айыппұл сала алады.
Борышкердің қарызы тек сот шешімімен ғана мүлкімен өтелетінін ұмытпаңыз. Егер соттың үкімі болса, борышкердің қарызы өз мүлкімен қайтарылуы мүмкін. Алайда бұл жағдайда да арестті тек сот орындаушысы ғана қоюы мүмкін.
Үйдің арестте тұрғанын тексеру үшін Әділет министрлігінің арнайы порталы бар, онда Атқарушылық іс жүргізу органдарының автоматтандырылған ақпараттық жүйесі арқылы тексеруге болады.
Егер сізге ұқсас жағдай орын алса, қорықпай, заңды түрде әрекет етіңіз және заңсыз әрекеттерге жол бермеңіз!