Бүгін Мемлекет басшысы Ұлттық Құрылтай отырысында еліміздің әлеуметтік, экономикалық және идеологиялық саясатының басты бағыттарын айқындап, маңызды мәселелерге тоқталды. Оның ішінде салық реформасының маңызы, идеологиялық жұмысты күшейту, мәдениетті қолдау, сондай-ақ өңірлердің дамуы Қазақстанның тұрақты өсуінің негізі екені атап өтілді.
Президенттің «Қуатты аймақтар – қуатты ел» деген ұстанымы Алматы үшін аса маңызды. Ел экономикасының негізгі қозғаушы күші ретінде біздің қаламыз теңгерімді дамуды қамтамасыз етуде шешуші рөл атқарады. Осы тұрғыда салық түсімдерін тиімді пайдалану және қала тұрғындары үшін нақты пайдасы бар жобаларға инвестиция тарту басым бағыттардың бірі болуға тиіс.
Мемлекет басшысының кәсіби-техникалық білім беруді дамыту туралы айтқан ойы да өзекті. Себебі, біздің қаламыз – ғылым мен инновацияның, кәсіпкерліктің орталығы. Өнеркәсіп, технология және креативті салалар үшін білікті кадрлар даярлау – мегаполис экономикасын нығайтып қана қоймай, жастарға жаңа мүмкіндіктер ашады.
Сонымен қатар, баяндамасында қоғамдық этиканы реттеу, алаяқтықпен күресу және жат ағымдардың ықпалына қарсы тұру мәселелері көтерілді. Бұл ретте, біз құқықтық мәдениетті нығайту, азаматтық қоғаммен өзара іс-қимылды арттыру және қауіпсіз әрі үйлесімді қала ортасын қалыптастыру бойынша жұмыстарды жалғастырамыз.
Жалпы, Президент ұсынған бастамалар – уақыт талабына берілген жүйелі әрі нақты жауап, деп жазды өзінің әлеуметтік желісінде Алматы қаласы Мәслихатының төрағасы Мейіржан Отаншиев.