Қасым-Жомарт Тоқаев пойыздың тамбурында Ұлттық ұлан сарбазын белгісіз адамдардың соққыға жығылған видеожазбасымен танысып, кінәлілерді жазаға тартуды тапсырды. Бұл туралы Президенттің кеңесшісі — баспасөз хатшысы Берік Уәли хабарлады.
Берік Уәлидің айтуынша, Тоқаев ішкі істер министрі Ержан Саденовке құқықбұзушыларды ұстап, қазақстандық заңнамаға сәйкес жауапкершілікке тарту бойынша шұғыл шаралар қабылдауды тапсырған.
«Армияда және басқа да күш құрылымдарында орын алған барлық зорлық-зомбылық фактілері Мемлекет басшысының бақылауында. Президент 2 қыркүйектегі Жолдауында жас сарбаздардың денсаулығы мен абыройына нұқсан келтіруді болдырмау қажеттігін атап өтіп, осы мәселеде барлық жауапкершілік әскери бөлімдер командирлеріне жүктелетінін қадап айтты», — деп жазды Уәли.
Ішкі істер министрлігінің мәліметінше, оқиға 2023 жылдың күзінде, әскери қызметін аяқтап, запастағы сарбаздар үйлеріне қайтып келе жатқан кезде орын алған.
«23 қыркүйекте Қазақстан Республикасы Қылмыстық кодексінің 440-бабы бойынша "Әскери қызметшілер арасындағы жарғыға сай емес қарым-қатынастарды бұзу" фактісімен қылмыстық іс қозғалды. Куәгерлер, жәбірленуші және күдіктілер анықталды. Күдіктілерді ұстауға бағытталған шаралар кешені қабылданды. Тергеу Ішкі істер министрінің жеке бақылауында», — делінген мәлімдемеде.