Президент Қасым-Жомарт Тоқаев Үкіметтің кеңейтілген отырысында Ұлттық банктің жұмысын сынға алып, жаңа экономикалық жағдайларға бейімделу қажеттігін атап өтті. Мемлекет басшысы валюта бағамының тұрақсыздығы мен инфляцияны бақылау мәселелеріне ерекше назар аударды.
– "Ұлттық банк жұмысын мандатына сай жүргізіп отыр, бұл түсінікті. Алайда халықты ең алдымен ұлттық валюта бағамының құбылмалылығы алаңдатып отыр. Сарапшылардың пікірінше, Америка долларының нығаюына байланысты теңгеге қысым жалғасады. Сондықтан валюта бағамының тұрақтылығын қамтамасыз ету және инфляцияны ауыздықтау – қазіргі кезде басты міндеттердің бірі", – деді Президент.
Қасым-Жомарт Тоқаев еркін нарық ұстанымдарының қазіргі экономикалық жағдайларда жеткіліксіз екенін атап өтті.
– "Біз еркін нарықтамыз, өз бетімізбен жүреміз деген ұстаным қазір жұмыс істемейді. Өйткені қазіргі ахуалды қалыпты деп айтуға болмайды", – деп мәлімдеді Мемлекет басшысы.
Президент Ұлттық банкке Үкіметпен тығыз әріптестікте жұмыс істеп, қаржы-экономикалық тұрақтылықты қамтамасыз ету бойынша шараларды күшейтуді тапсырды.