Президент Қасым-Жомарт Тоқаев Құрылыс кодексі мен «Қазақстан Республикасының кейбір заңнамалық актілеріне сәулет, қала құрылысы және құрылыс мәселелері бойынша өзгерістер мен толықтырулар енгізу туралы» заңға қол қойды, деп хабарлайды Аqshamnews.kz тілшісі.
Екі құжаттың да мәтіні баспасөзде жарияланады.
Естеріңізге салайық, Парламент 29 желтоқсан күні Құрылыс кодексін қабылдап, президенттің қарауына жолдаған. Жаңа кодекс пен оған ілеспе заң аясында құрылыс нарығы субъектілерінің рөлін саралау және нақтылау, отандық ғылымды қолдау және құрылыс туралы шешімдер қабылдау кезінде жұртшылықтың қатысуы көзделген. Сондай-ақ мемлекеттік бақылау жөніндегі шаралар күшейтілді, бұл сапалы қала құрылысын жоспарлау мен құрылысты қамтамасыз етеді.
Сондай-ақ сейсмикалық қауіпті аумақтардағы құрылыс талаптары күшейтіліп, қала құрылысын жоспарлау кезінде сейсмикалық микроаймақтау карталарын міндетті есепке алу тәртібі енгізіледі. Құрылыс кодексі қажетті инженерлік ізденім жұмысын жүргізбей тұрып жобалық құжаттаманы дайындауға және нысандарды салуға тыйым салады. Егер құрылыстың тығыздығы, ғимараттардың биіктігі немесе әлеуметтік инфрақұрылыммен қамтамасыз ету нормалары бұзылса, егжей-тегжейлі жоспарлау жобасына өзгеріс енгізуге болмайды.
Жаңа Құрылыс кодексінде цифрландыру мәселелеріне де ерекше назар аударылған.