Мемлекет басшысы Қасым-Жомарт Тоқаев Қазақстандағы орыс, славян және казак ұйымдары қауымдастығының төрағасы, Парламент Мәжілісінің депутаты Сергей Пономаревті қабылдады, деп хабарлайды, Aqshamnews.kz тілшісі.
Кездесу барысында Президентке Қауымдастықтың жалпыұлттық бірегейлікті нығайту, ел бірлігін күшейту және жас ұрпақты отаншылдық рухта тәрбиелеу бағытында атқарған жұмыстары жөнінде ақпарат берілді.
Сергей Пономарев мемлекеттік тілді ұлтты ұйыстыратын маңызды фактор ретінде дәріптеудегі славян ұйымдарының қызметіне тоқталды. Сондай-ақ ол Қазақстан халқы Ассамблеясын дамытудың 2030 жылға дейінгі «Бірлігіміз – әралуандықта» тұжырымдамасын іске асыру аясындағы Қауымдастықтың биылғы жоспарын таныстырды.
Қасым-Жомарт Тоқаев этносаралық келісім мен бірлікті сақтау мемлекеттік саясаттың негізгі басымдықтарының бірі екенін атап өтті. Президенттің айтуынша, әділдік пен баршаға тең мүмкіндік жасау – Әділетті Қазақстанды құрудың басты қағидаттары.
Осыған орай Қазақстан халқы Ассамблеясы мен оның құрамындағы ұйымдар барлық этнос өкілдері арасында қазақстандық патриотизмге негізделген ортақ құндылықтарды кеңінен насихаттауға ықпал ететінін айтты.