Мемлекет басшысы, Жоғарғы бас қолбасшы Қасым-Жомарт Тоқаев Қорғаныс министрі Дәурен Қосановты қабылдады,- деп хабарлайды Аqshamnews.kz тілшісі Ақордаға сілтеме жасап.
Кездесуде министр 2025 жылдың алғашқы жартыжылдығындағы Қарулы күштердің атқарған жұмысы туралы есеп берді. Президентке армияның жауынгерлік дайындығы, көктемгі шақыру науқанының қорытындылары, әскери-патриоттық тәрбие мен әскери қызметшілерді әлеуметтік қолдау шаралары жөнінде баяндалды.
Сондай-ақ, Қосанов президент тапсырмаларының орындалу барысын таныстырып, әскердің ұтқырлығын арттыру, әуе шабуылына қарсы қорғанысты күшейту, ұшқышсыз ұшатын аппараттар мен инфрақұрылымды дамыту бойынша мәлімет берді.
Президент Қасым-Жомарт Тоқаев министрге әскери әлеуетті нығайтуға қатысты бірқатар тапсырма беріп, әскери қызметшілердің қауіпсіздігін қамтамасыз ету мен жарақаттану, жазым болу оқиғаларын болдырмау үшін кешенді шаралар қабылдаудың маңыздылығын атап өтті.