Ішкі істер министрі Ержан Сәденов Президент Қасым-Жомарт Тоқаевқа еліміздегі құқықтық тәртіп пен қоғамдық қауіпсіздік жай-күйі туралы есеп берді, деп хабарлайды aqshamnews.kz
Ержан Сәденовтің мәлімдемелері:
Қылмыстық жағдай туралы ақпарат:
- Жыл басынан бері қылмыстың деңгейі төмендеген. Қылмыстық құқықбұзушылықтар 5,5 мыңға, жалпы қылмыстар 10 мыңға азайған.
- Қоғамдық орындарда және кәмелетке толмағандардың қатысуымен жасалған құқықбұзушылықтар саны да төмендеген.
- Қылмысты ашу көрсеткіштері жақсарып, құқықбұзушылықтың алдын алу шаралары тиімді жүргізілуде.
«Заң мен Тәртіп» қағидатын іске асыру және құқықбұзушылыққа мүлдем төзбеушілік:
- Әкімшілік құқықбұзушылықты болдырмау шаралары 40%-ға артқан, оның ішінде ұсақ бұзақылықтың алдын алу 30%-ға, көлік ережелерін бұзу 48%-ға көбейген.
- Көлік жүргізу құқығынан айырылған жүргізушілер саны 32%-ға артқан, олардың қатарында мас күйде рөлге отырған азаматтар да бар.
- Іздеуде жүрген 1,6 мыңнан астам қылмыскер ұсталған, олардың 158-і шетелде тұтқындалған.
Президент тапсырмаларының орындалуы:
- Ұйымдасқан қылмысқа, кибер қылмысқа және есірткі қылмыстарына қарсы күрес шаралары жалғасуда.
- Жол қауіпсіздігін қамтамасыз ету, қылмыстық атқару жүйесін жетілдіру және кадр үдерістерін цифрландыру бойынша Президент тапсырмаларының орындалуы таныстырылды.
Президент елдегі құқықтық тәртіп пен қоғамдық қауіпсіздікті одан әрі арттыруға қатысты бірқатар тапсырмалар берді.