Әбілхан Қастеев атындағы Қазақстан Республикасының Мемлекеттік өнер музейінде Қазақстанның Халық суретшісі Сабыр Әбдірасылұлы Мәмбеевтің (1928-2017) «ШЕБЕРДІҢ КЕСКІНДЕМЕСІНДЕГІ ПОРТРЕТ» атты жеке көрмесі ашылады. Экспозицияда суретшінің отбасылық қорынан алынған жиырмадан астам кескіндемелік туындысы қойылады.
Қазақстанның Халық суретшісі Сабыр Әбдірасылұлы Мәмбеев – 1950 жылдардағы Қазақстан бейнелеу өнері буынының өкілі. Сол жылдары қазақ бейнелеу өнерінің өрлеуі Мәскеу, Ленинград, Харьков, Киев қалаларындағы көркемөнер жоғары оқу орындарында білім алған К. Телжанов, М. Кенбаев, Г. Исмаилова, А. Ғалымбаева, К. Шаяхметов, С. Мәмбеев және басқа да дарынды суретшілердің келуімен байланысты болды. Кәсіби білім алған қазақ суретшілері бейнелеу өнеріне жаңаша үн қосты. Кескіндеме салу тәсілдері дәстүрлі рухани-көркем құндылықтармен байытылып, суретшілердің шығармашылығы ұлттық колоритпен жаңғыртылды.
– Сабыр Мәмбеев бейнелеу өнерінде ұлттық кескіндеме тілі мен өзіндік мәнерін табуға ұмтылған алғашқы қазақ суретшілерінің бірі болды. Биылғы көрме суретшінің шығармашылығындағы портрет жанрына арналады. Бұл туындылардың арасында көрермендер назарына алғаш рет ұсынылып отырған жұмыстар да бар, – дейді көрме жетекшісі, музейдің «Қазақстан бейнелеу өнері» бөлімінің аға ғылыми қызметкері Л. Әбілдаева.
Сабыр Әбдірасылұлы 1946 жылы Алматы көркемөнер училищесін, 1953 жылы КСРО Көркемөнер академиясының И. Е. Репин атындағы Ленинград кескіндеме, мүсін және сәулет институтын тәмамдады. Алматы көркемөнер училищесінде сабақ берді. 1963 жылы «Қазақ КСР-нің өнеріне еңбек сіңірген қайраткер» атағын алды. 1978 жылы «Халықтар достығы» орденімен марапатталды. 1980 жылы «Қазақ КСР Халық суретшісі» атағына ие болды. Бірнеше рет Қазақстан Суретшілер одағының төрағасы болып сайланды.
Көрме 8 қазан күні ашылып, 27 қазанға дейін жалғасады.