Алматыда полиция, БАҚ және қоғам арасындағы ынтымақтастықтың жаңа тәсілдері талқыланды
ІІМ Алматы академиясында бұқаралық ақпарат құралдары, блог-қауымдастықтар, қоғамдық ұйымдар мен қазақстандық полицияның имиджін жақсарту бағытында жұмыс істейтін лауазымды тұлғалар қатысқан конференция өтті. Шараға телеарналардың, баспа және интернет-басылымдардың журналистері, Қазақстан халқы Ассамблеясының өкілдері, сондай-ақ ІІМ басшылығы мен өңірлік полиция департаменттерінің орынбасарлары онлайн режимде қатысты.
Конференция барысында үш институт арасындағы байланысты жетілдірумен ғана шектелмей, проблемалық мәселелер мен оларды шешу жолдарына назар аударылды. Қызу талқылауда қатысушылар заманауи үрдістерді ескере отырып, өзара іс-қимылды күшейтуге, жаңа байланыс арналарын енгізуге және азаматтар үшін кері байланыс орнату мүмкіндіктерін кеңейтуге баса назар аудару қажет деген ортақ пікірге келді.
«Біз бүгін полиция мен қоғамның өзара әрекетін жақсарту үшін барлық мүмкіндікті пайдалануымыз керек. Басты міндетіміз – азаматтардың өздерін қауіпсіз сезінуі үшін сенімді нығайту және тиімді коммуникациялық механизмдер құру», – деді Қазақстан Республикасы ІІМ Алматы академиясының бастығы міндетін уақытша атқарушы Жанат Дильбарханова.
Конференция қорытындысы бойынша қатысушылар тұрақты бірлескен іс-шаралар өткізу, полиция қызметкерлеріне арналған тренингтер ұйымдастыру, сондай-ақ құқық қорғау органдарының медиа және қоғаммен жұмысын жетілдіруге бағытталған коммуникациялық стратегиялар мен әдістемелік ұсынымдар әзірлеу туралы ұсыныстар жасады.