Операция барысында полицейлер еліміздегі 72 мыңнан астам жалға алынған пәтерге тексеру жүргізді. Бұл туралы Ішкі істер министрлігінің өкілі Шұғыла Тұрлыбек айтты, деп хабарлайды almaty-akshamy.kz ҚазАқпаратқа сілтеме жасап.
Қыркүйек айынан бастап жүргізіліп келе жатқан «Учаске» жедел алдын алу іс-шарасы жалғасуда. Оның басты міндеті - қызмет көрсетілетін учаскелерде мәселелерді зерделеу, құқық бұзушылықтың алдын алу және ескерту. Учаскелік полиция инспекторлары тұрғындармен танысып, тәртіп бұзушыларды анықтау және полиция есебінде тұрғандарды тексеру, сондай-ақ проблемаларды шешу үшін аулаларды және пәтерлерді аралап халықпен кездесулер өткізеді. Жалға берілетін пәтерлер, базарлар, тұрмысы нашар отбасылар, азаматтық қару иелері мен шетелдіктер тексеріледі», - деді Шұғыла Тұрлыбек Ішкі істер министрлігі ұйымдастырған апталық брифингіде.
Оның айтуынша, полиция белгілі бір тұрғылықты жері жоқ адамдарды, заңсыз келген шетелдіктерді, тыйым салынған заттарды сақтау фактілерін анықтау мақсатында саяжайларды, қыстақтарды, шағын елді мекендерді аралайды.
«Бүгінгі таңда полицейлер 4 миллионға жуық пәтер мен жеке үйлерді аралап, 240 мыңнан астам саяжайды және 52 мыңға жуық шаруа қожалығы мен қыстақтарды тексеріп шықты. 72 мыңнан астам жалға алынған пәтерге тексеру жүргізді. Нәтижесінде, мемлекеттік кіріс органдарында тіркеусіз тұрғын үйді жалға берудің 9 мыңға жуық фактісі анықталды. Атыс қаруын сақтау және алып жүру ережелерін бұзудың 2,5 мыңға жуық жағдайы тіркелді. Заңсыз айналымнан тіркелмеген атыс қаруының 277-сі алынды», - деді ол.
Операция басталғаннан бері полиция қызметкерлері 388 мыңнан астам әкімшілік құқық бұзушылықтың, оның ішінде 6 мың ұсақ бұзақылық фактісінің, тұрмыста 8 мыңнан астам заң бұзушылықтың, 64 мыңнан астам көші-қон заңнамасын бұзу жағдайының жолын кесті.