Күзгі-қысқы кезеңнің басталуымен тұрғындарға электр жылытқыштарды, пештер мен газ жабдықтарын пайдалану кезіндегі қауіпсіздік ережелері еске салынуда. Өрттердің көбі осы жабдықтарды пайдалану ережелерін бұзу салдарынан орын алады, деп хабарлайды aqshamnews.kz
Шымкент қаласы ТЖД қызметкерлері пештерді, электр жылытқыштарды, электр және газ жабдықтарын қауіпсіз пайдалану ережелерін түсіндіруге ерекше назар аударуда. Іс-шара «ҚазТрансГазАймақ» АҚ филиалының қызметкерлері мен Жастар ресурстық орталығының еріктілерімен бірлесе ұйымдастырылды.
Іс-шара барысында әлеуметтік осал топтардағы, мүмкіндігі шектеулі азаматтар мен ардагерлерге тұрмыстағы өрт қауіпсіздігі, пештер мен газды жылыту құралдарын қолдану ережелері түсіндірілді. ТЖД мамандары электр аспаптары мен газ жабдықтарын қауіпсіз пайдалану тәртібін ерекше атап өтті, ал газ қызметі өкілдері газ сигнализаторларын орнату және пайдалану туралы толық ақпарат берді.
Өрт қауіпсіздігі мәдениетін арттыру мақсатында сұрақ-жауап түрінде түсіндіру жұмыстары жүргізілді. Мамандар улы газбен улану кезінде алғашқы көмек көрсету, электр жылытқыштарды орнату және пайдалану талаптары бойынша тұрғындардың сұрақтарына жауап берді. Олар шұғыл қызметтердің байланыс нөмірлерін еске салып, өрт қауіпсіздігі туралы жадынамалар таратып, мұржаны жылыту маусымында қалай тазалау керектігін көрсетті.
Жылыту маусымы басталғалы қатты отынмен пайдаланылатын 3500-ден астам тұрғын үй, соның ішінде 83 мүмкіндігі шектеулі азаматтар мен ардагерлердің үйлері тексерілді. Бұл үйлерде кезең-кезеңмен көміртегі тотығын анықтайтын сигнализаторлар орнатылуда. Бүгінгі күнге дейін 98 улы газды анықтайтын сигнализатор орнатылып, 193 пештің мұржасы арнайы тәсілмен тазаланды.
«Бұл шаралар тұрғындар арасында өрт қауіпсіздігін насихаттап, өрт жағдайында дұрыс әрекет ету мәдениетін қалыптастыруға бағытталған», - деп түсіндірді ТЖД бастығының орынбасары Еркін Отарғалымұлы.