Ішкі істер министрінің орынбасары Абай Қайырбеков Перизат Қайраттың түзеу мекемесінде қандай қызметке орналасатыны және оны анасы Ғайни Алашбаевамен бір колонияға жіберу мүмкіндігі туралы сұрақтарға жауап берді, - деп хабарлайды Aqshamnews.kz тілшісі Tengrinews.kz-ке сілтеме жасап.
Перизат Қайрат қайда жұмыс істеуі мүмкін?
Абай Қайырбековтың айтуынша, Перизат Қайраттың еңбекке орналастырылуы оның дағдылары мен қолжетімді вакансияларға байланысты айқындалады.
"Оны қай жерге орналастыра алатынымызды, сәйкес бос орындарды қараймыз. Егер біліктілігі жетіспесе мұндай сотталғандарға қажетті оқыту жүргізіледі", - деді ол.
Қажет болған жағдайда Перизат Қайратты түзеу мекемесі жанындағы колледжде немесе курстарда оқыту қарастырылатынын қосты.
Бір колонияға этаптау мүмкін бе?
Вице-министрдің түсіндіруінше, анасы мен қызын бір колонияға этаптау мүмкін. Алайда оларды бір бөлімшеде, әлде әртүрлі отрядта ұстау мәселесін мекеменің өзі оперативтік жағдай мен қауіпсіздік талаптарын ескере отырып шешеді.
"Мекеме ішінде орналастыру кезінде бұл мәселелер ескеріледі. Бір отрядта ма, әлде әртүрлі отрядта ма жазасын өтейтіні — оперативтік жағдайға байланысты шешіледі", - деді ол.
Бұған дейін не болды?
2024 жылғы қарашада Перизат Қайрат тасқыннан зардап шеккендерге көмек ретінде жиналған 1,5 млрд теңгеден астам қаражатты жымқырды деген күдікпен ұсталды. Тергеу мәліметінше, қаражаттың бір бөлігі элиталық жылжымайтын мүлік, көлік және қымбат сапарларға жұмсалған. Сондай-ақ ол ақшаны қолма-қол жасау үшін таныстары мен туыстарын тартты деген ақпарат болды.
Кейін Қаржы мониторингі агенттігі Перизат Қайраттың тағы бір эпизод бойынша, Палестина халқына гуманитарлық көмек ретінде жиналған қаржыны жымқыруға қатысы болуы мүмкін екенін хабарлады.
Ақырында Перизат Қайрат 10 жылға бас бостандығынан айыру жазасына кесілді.