Ішкі істер министрлігі Павел Дуровтың Көлсай көлінде шомылуына байланысты жауапкершілік мәселесін Қазақстанның Экология және табиғи ресурстар министрлігі шешетінін мәлімдеді, деп хабарлайды Aqshamnews.kz Tengrinews.kz тілшісіне сілтеме жасап.
Не жағдай болды?
"ВКонтакте" мен Telegram мессенджерінің негізін қалаушы Павел Дуров Көлсайда суға шомылып, желі қолданушыларының наразылығын тудырған видео жариялады. "Көлсай көлдері" ұлттық паркінде бұл суда шомылуға тыйым салынғаны айтылып, қызметтік тексеріс басталғаны хабарланды.
Ұлттық парктің табиғи кешендерді қорғау және көбейту бөлімінде белгіленген ережелерді бұзғаны үшін 10 айлық есептік көрсеткіш мөлшерінде айыппұл қарастырылғаны, 2025 жылы оның көлемі 39 320 теңге екенін аталды.
ІІМ не дейді?
ІІМ Әкімшілік полиция комитеті төрағасының орынбасары Алексей Милюк тыйым салынған аймақтағы шомылуға қатысты жағдайды түсіндіріп, бұл мәселе бойынша жауапкершілікті Экология министрлігі айқындайтынын мәлімдеді.
"Тыйым салынған аймақта шомылу ерекше қорғалатын табиғи аумақта болған жағдай. Осы аймақта шомылуға қатысты жауапкершілік, сондай-ақ хаттама жасау және айыппұл салу Экология министрлігінің құзыретіне жатады. Біз тиісті материалды тіркеп, ведомстволық әрекет бойынша жібердік. Қазір олар істі қарап жатыр", - деді Алексей Милюк.
Оның айтуынша, ІІМ қызметкерлері бұл факті бойынша әкімшілік материалдар рәсімдемеген, тек БАҚ-та жарияланған мәліметтерді жинап, экологиялық ведомствоға жолдаған.
"Біздің құзырет - қоғамдық тәртіпті сақтау, жол қауіпсіздігі, балық және орман шаруашылығы мәселелері. Әр мемлекеттік органның әкімшілік хаттама жасау бойынша өз құзыреті бар. Бұл жағдайда құзырет экологиялық органдарға тиесілі", - деп нақтылады ол.
Айыппұл мөлшеріне қатысты ІІМ өкілі бәрі құқықбұзушылықтың саралануына байланысты болатынын айтты: "Қалай сараланатынын қарау керек. Ең төмені - ескертуден, қателеспесем, 10 АЕК-ке дейін болады", - деді маман.
Еске салайық, бұған дейін Павел Дуров Алматы облысындағы Көлсай көлінде суға түскен видеосын жариялаған еді.