Әлеуметтік осал топтағы тұрғындар баспаналы болды.
Наурызбай ауданының «Шұғыла» ықшамауданында орналасқан «Alem City-2» тұрғын үй кешенінде салынған 3 үйден бірінші болып халықтың әлеуметтік осал тобында кезекте тұрған тұрғындарға 124 пәтердің кілті табыс етілді.
Көптен күткен қуанышын жасыра алмай, жүздері қуаныштан алабұртқан шаһар тұрғындарының алғашқы тобына пәтер кілтін салтанатты түрде Наурызбай ауданының әкімі Назира Тоғызбаеваның өзі тапсырды. Бұл күні баспаналы болып, мол қуанышқа кенелген әлеуметтік көмекке аса мұқтаж жандардың қала әкімшілігіне, аудан басшылығына алғысын жаудырғанына куә болдық.
Алматы қаласының әкімі Е.Досаевтың тікелей тапсырмасымен биыл шаһардың коммуналдық-тұрғын үй қорынан халықтың әлеуметтік осал тобын құрайтын тізімде тұрған азаматтарға кезек тәртібімен 2 000 арендалық пәтерді ұсыну жоспарланып отыр. Айта кетерлігі, дәл осы күні аудан аумағында тапсырылған 124 пәтердің 75-і – екі бөлмелі, 49-ы – бір бөлмелі. Халықтың әлеуметтік осал тобына жататын алғашқы боп пәтер иеленгендердің 35-і – жетім бала, 14-і – І, ІІ топтағы мүгедек, 8-і – мүгедек бала тәрбиелеп отырған отбасы, 4-і – зейнеткер, 63-і – толық емес отбасы.
«Жыл соңына дейін кезекте тұрған қала тұрғындарына қала әкімінің тапсырмасына сай, 2 000 пәтер беру ұсынылған. Соның 400-і жетім балаларға беріледі. Бүгін ұсынылған 124 пәтер кілті он жылдан астам тұрғын үй кезегінде тұрған қала тұрғындары ішіндегі халықтың әлеуметтік осал топтарына табысталды. Олардың басым бөлігі 2010-2011 жылдардан бері кезекте тұрған», – деп мәлімдеді Алматы қалалық коммуналдық инфрақұрылымды дамыту басқармасы басшысының орынбасары Ғалымжан Әбдішүкірұлы.