Тіл саясаты комитетінің мәліметінше, қазақ тілінде сөйлейтін өзге ұлт өкілдерінің саны артып келеді.
Ғылым және жоғары білім министрлігіне қарайтын Тіл саясаты комитеті Ашық НҚА порталында Қазақстан Республикасында тіл саясатын дамытудың 2023-2029 жылдарға арналған тұжырымдасының жобасын қоғам талқысына ұсынды.
Жобада Қазақстандағы қазіргі тілдік ахуалға сипаттама берілген.
«Қазақстанда азаматтардың тілдік құзыреттілігі әртүрлі қалыптасып отыр. Атап айтқанда, қазақтілділер, қазақ-орыстілділер, орыстілділер, этникалық қазақша, этникалық орысша тілділер немесе этникалық орысша-қазақша үш тілді білетіндер және қазақ-орыс-ағылшын үш тілді меңгергендер», – деп жазылған тұжырымдама жобасында.
Тіл саясаты комитетінің мәліметінше, Қазақстанда қазақ тілінде сөйлейтін азаматтардың саны артып келеді.
Қазақстанда тұратын өзге ұлт өкілдерінің қазақ тілінде оқи, жаза және сөйлей алатындарының үлесі төмендегідей:
Түркітілдес халықтардың ішінде:
- өзбектердің 72 пайызы;
- ұйғырлардың 71,7 пайызы;
- қырғыздардың 58,5 пайызы қазақ тілінде сөйлей алады.
Бұл ұлттардың 12 пайызы қазақша оқып, жазуды жоғары деңгейде меңгергені анықталған.
Славян диаспорасы ішінде:
- орыстардың 25,1 пайызы;
- украиндардың 23,7 пайызы;
- белорустардың 22,8 пайызы;
- поляктардың 22,1 пайызы;
- неміс диаспорасының 25,2 пайызы ауызекі қазақ тілін түсінеді.
«Аталған диаспоралар ішінде қазақша оқып, жаза білетіндер үлесі – 2,9 пайызды құрайды. Көрсетілген сандық өзгерістер мемлекеттік тіл қолданысының сапасын әлі де болса жақсартуды талап етеді», – деп жазылған тұжырымдама жобасында.