Сонда алға ілгерілейміз
Президент өте өзекті мәселелерді көтерді. Сонымен бірге, министрліктер мен комитет басшыларына бірқатар нақты тапсырмалар берілді. Соның ішінде «Тұрақты қор» туралы ой айтылды. Биылдың өзінде 18-19% инфляция орын алды, деген ойын жеткізді экономист,қоғам белсендісі Бекнұр Қисықов, деп хабарлайды Almaty-akshamy.kz.
Дүкендердегі баға шарықтап барады. Соның бәріне тұрақты баға жасау қажет. Осыншама қаржы мемлекет тарапынан бөлінді. Бірақ азық-түлік бағасы өсіп барады. Осыған орай, атқамінерлер нақты істер қабылдауы керек еді. Алайда, істеліп жатқан істер өз нәтижесін бермеуде деген пікірін де жасырмады ол.
«Қазіргі таңда ең өзекті мәселе, ол – қант. Өз жерімізде шығарылатын өнімнің құнының күрт өсуі күмән тудырады. Неге олай? Бұл жағын дөп басып ешкім айта алмайды. Ең бастысы, инфляцияны тездетіп тежемесе болмайды. Еліміздегі бұрыннан келе жатқан қант зауыттарының жұмысына сараптама жүргізілу қажет. Осыдан кейін барып нәтиже шығара аламыз. Жалпы үкімет отырысында айтылған игі ойлар мен нақты тапсырмаларды кезек күттірмей орындау қажет. Сонда алға ілгерілейміз», - деді қоғам белсендісі.