Қазақстандық ғалымдар ойлап тапқан бірегей әзірлемесі кең таралған аурулардан болатын өлім-жітім мен мүгедектікті төмендетуге мүмкіндік береді.
Жергілікті өнертабыс тамырлардың өтімділігін қалпына келтіруге мүмкіндік береді. Бүгінде ғылыми орталықтың қызметкерлері қазақстандық және Еуразиялық салалық ведомствоның патенттерін алды, деп хабарлайды Almaty-akshamy.kz Qazaqtv.com сайтына сілтеме жасап.
"Біз жасаған құрылғы қан тамырындағы атеросклеротикалық түйіншектерді түбегейлі алып тастауға мүмкіндік береді. Қарапайым тілмен айтқанда, артерияны тазартады. Құрылғыны тамырға бір енгізгенде бірден бірнеше артерияны тазалауға болады. Екіншіден, түйіршек түзілуінің алдын алу мақсатында бір-екі жылдан кейін тағы бір қайталауға болады. Бұл операцияны бірнеше мәрте қайталап жасауға болады. Тек стент орнату кезінде жасауға рұқсат етілмейді. Артерияға стент орнатса, ол өмір бойы қалып қояды. Кейін көптеген асқынуларға алып келетінін білеміз", - дейді тамыр патологиясы орталығының директоры Оралбай Дәрменов.
Отандық өнертабыс қолданысқа енгізілсе, келешекте тамырларды стенттеу, сондай-ақ жүрек, ми, аяқтағы күретамырларға күрделі операциялардан бас тартуға болады. Емнің бұл түрі жеңілірек өтеді, нәтижесі де жақсы.
"Біздің құрылғымыз – әлемдік жаңалық. Болашақта ол стенттеу және шунттау әдістерін қолданыстан шығаруға ықпал етеді деп ойлаймыз. Бұл әдісті қан тамырларының атеросклеротикалық зақымдануы бар адамдар қолдана алады. Атеросклероз ауруы қазір жиі кездеседі. 40 жастағылардың арасында әрбір төртінші адамда, 60 жастағылардың арасында әрбір екінші адамда осы ауру анықталады", - дейді тамыр патология орталығының директоры Оралбай Дәрменов.
Жаңаша емдеу процедурасы қазақстандықтар үшін аса қымбатқа түспейді. Ұқсас әдістерге қарағанда оның құны әлдеқайда төмен. Қазір құрылғының зертханалық және өнеркәсіптік үлгілері дайындалу үстінде. Бұл клиникалық зерттеулер жүргізіп, коммерциялық өндірісті жолға қою үшін қажет.