Биыл 20 тамызда Алматы қаласы Әділет департаментінің Зияткерлік меншік құқықтары бөлімі қызметкерлері «Е» ЖШС-не қатысты бөтеннің тауар белгісін заңсыз пайдалану фактілері бойынша жоспардан тыс тексеріс жүргізді. Тексеріс жүргізудің негізі ретінде отандық белгілі брендтің құқық иеленушісінің ресми өтініші алынды.
Іс-шара барысында елеулі заңбұзушылықтар анықталды: құқық иеленушінің тіркелген тауар белгісін еліктетіп, шатастыратындай дәрежеде ұқсас белгілермен таңбаланған 18 мыңнан астам өнім бірлігінің бар екендігі белгілі болды. Анықталғандардың ішінде дайын өнімдер, бос ыдыстар, қақпақтар мен жапсырма рулондары бар.
Бұл іске ерекше мән беретін жайт – тек сақтау және сату мақсатындағы өнім ғана емес, сонымен қатар заңсыз өндіріс фактісі де әшкереленді. Арнайы жабдықта бөтеннің тауар белгісін қолданып, қаптау және таңбалау жұмыстары жүргізілгені анықталды. Бұл контрафактілік өнімді өндірудің жолға қойылған үдерісі бар екенін айғақтайды.
Барлық анықталған тауарлар тәркіленді, тиісті хаттамалар жасалды, ал материалдар Қазақстан Республикасының Әкімшілік құқық бұзушылық туралы кодексінің 158-бабы аясында іс бойынша одан әрі қарау үшін сотқа жолданды.
Отандық нарық үшін маңызы
Зияткерлік меншікті қорғау – бұл тек заңды сақтау мәселесі ғана емес, экономикалық қауіпсіздіктің стратегиялық факторы. Брендтердің заңсыз пайдаланылуы отандық компаниялардың беделіне нұқсан келтіреді, тұтынушылардың сенімін азайтады және ұлттық бизнестің бәсекеге қабілеттілігін әлсіретеді.
Алматы қаласы Әділет департаменті мұндай фактілерге жүйелі түрде тосқауыл қойылатынын мәлімдейді. Басты басымдық – құқық иеленушілердің құқықтарын қорғау, кәсіпкерлер үшін ашық әрі адал жағдайды қамтамасыз ету, зияткерлік меншікке құрмет мәдениетін қалыптастыру болып қала береді.
Экономикалық егемендік пен ұлттық мақтаныш
Отандық брендтерді қорғау – бұл тек құқық қолдану тәжірибесі ғана емес, сондай-ақ Қазақстан Республикасының экономикалық егемендігін нығайту. Бұл – елде еңбек, шығармашылық пен инвестицияларды қорғауға бағытталған жағдай жасалып отырғанының айқын дәлелі.
Осылайша, «Е» ЖШС ісі Қазақстанның құқықтық тәртіпті нығайтуға, адал бәсекелестікті дамытуға және елдің заманауи әрі құқықтық мемлекет ретінде, ұлттық жетістіктерді бағалайтын әрі қорғайтын мемлекет ретінде имиджін қалыптастырудағы табандылығын көрсететін маңызды көрсеткішке айналды.