Өңірлік коммуникациялар қызметі алаңында орман қорын сақтау мен табиғи өрттің алдын алу шаралары талқыланды., – деп хабарлайды aqshamnews.kz тілшісі. Атқарылып жатқан жұмыс туралы «Қазавиаорманқорғау» РМҚК Алматы авиациялық бөлімшесінің басшысы Бекзат Байшалов баяндады.
Оның айтуынша, төтенше жағдайда жедел әрекет ету ғана емес, сондай-ақ тұрақты мониторинг жүргізу мен халық арасында түсіндіру жұмысын күшейту арқылы олардың алдын алу салалық қызметтің негізгі міндеті.
Спикердің айтуынша, өрттің едәуір бөлігі табиғат аясында демалғанда абайсызда шығады, кейде ауыл шаруашылығына тиесілі алқапты өртегенде де жиі өһрт шығады екен.
«Қазіргі уақытта Алматы облысының аумағында өрт қаупі ең жоғары әрі күрделі кезең басталып отыр. Алда жаздың соңғы айы мен күз мезгілі келеді. Көпжылдық статистикаға сәйкес, дәл осы уақытта өрт қаупі бірнеше есе артады. Өсімдік қурап, шөп сарғаяды, жапырақ түсе бастайды. Ауа температурасының жоғары болуы мен желдің әсерінен мұның бәрі тез тұтанатын материалға айналып, орман алқаптары тіпті болмашы ұшқынның өзінен от алып кетіп жатады», – деді Бекзат Байшалов.
«Қазавиаорманқорғау» мамандары салалық қызметтермен бірлесіп аумақты үздіксіз әуеден бақылап жүр. Сонымен қатар өңір тұрғындары мен қонақтарды орманда қауіпсіздік ережесін қатаң сақтауға шақырды.
Өрт ошағын ерте анықтау мақсатында авиациялық бақылау қолданылады. Сондай-ақ халықты табиғат аясында қауіпсіздікті сақтауға үгіттеп жатыр.
Спикердің айтуынша, орман қорын сақтау әр адамның жауапкершілігіне тікелей байланысты, профилактика табиғи аумақтарды қорғаудың ең тиімді тәсілі болып қала береді.
«Орман мен таулы аумақта болған кезде белгіленбеген орында от жағып, сіріңке жағып, темекі тұқылын тастауға, сондай-ақ тұрмыстық қалдықты қалдыруға қатаң тыйым салынады. Естеріңізде болсын: орман қорын сақтау – әрқайсымыздың міндетіміз. Кез келген өрттің алдын алу оның салдарын жоюдан әлдеқайда оңай», – деп түйіндеді Бекзат Байшалов.