2024 жылғы 10 қыркүйекте Қазақстан Республикасының Орталық референдум комиссиясы Электоралдық оқыту орталығының алаңында саяси партиялардың, олардың филиалдарының, республикалық және өңірлік үкіметтік емес ұйымдардың, сондай-ақ бұқаралық ақпарат құралдарының өкілдері үшін «Республикалық референдумды әзірлеу мен өткізудің ерекшеліктері» тақырыбында онлайн-семинар өткізді.
Семинар ағымдағы жылдың 6 қазанына тағайындалған республикалық референдумға дайындық және оны өткізу жөніндегі Қазақстан Республикасы Орталық референдум комиссиясының Іс-шаралар жоспарына сәйкес ұйымдастырылды. Сонымен қатар, 2024 жылы сайлау процесіне қатысушыларды оқытуды ұйымдастыру жөніндегі Орталық сайлау комиссиясының іс-шаралар жоспары да негізге алынды.
Семинарда ҚР ОРК Төрағасының орынбасары Константин Петров, Орталық референдум комиссиясының мүшелері Сәбила Мұстафина, Анастасия Щегорцова, Асылбек Смағұлов сөз сөйледі.
Олар референдумды әзірлеу мен өткізудің құқықтық негіздері және практикалық ерекшеліктері туралы баяндап, референдум туралы заңнаманың жаңашылдықтары, науқанның мерзімдері мен кезеңдері, комиссиялардың өкілеттіктері, референдумды қаржыландыру мәселелері, азаматтарды референдумға қатысушылар тізіміне енгізу, үгіт-насихат жүргізу, қоғамдық байқау және сауалнамалардың талаптары, сондай-ақ мүгедектігі бар азаматтардың сайлау құқықтарын қамтамасыз ету мәселелеріне ерекше назар аударды.
Сонымен қатар, ҚР Энергетика министрлігінің Атом энергетикасы және өнеркәсібі департаменті директорының орынбасары Гүлмира Мұрсалова Қазақстандағы энергия қауіпсіздігін қамтамасыз етудегі АЭС-тің рөлі және еліміздегі атом өнеркәсібінің болашағы туралы толық мәлімет берді.
Спикерлердің баяндамаларынан кейін қатысушылардан 50-ге жуық сұрақ қойылып, олардың барлығына толық жауап берілді. Семинарға 300 адам қатысып, онлайн-трансляция 1000-нан астам қаралым жинады.
Референдум қатысушыларының осы санаттары үшін оқыту шараларын өңірлік деңгейде аумақтық референдум комиссиялары ұйымдастыратын болады.