Орталық референдум комиссиясының төрағасы Нұрлан Әбдіров референдум учаскелік комиссиялары дауыс беру күні, уақыты, орны және тәртібі туралы азаматтарға дауыс беру күнінен кемінде 10 күн бұрын, яғни осы жылдың 26 қыркүйегіне дейін хабарлау керек екенін атап өтті.
Осы науқан барысында комиссиялар дауыс беру құқығы бар азаматтарды референдумға жеке шақыруға ерекше көңіл бөлді. Шақырулардың бірыңғай формасын Орталық референдум комиссиясы аумақтық комиссиялармен бірлесе отырып әзірледі.
Кейін аумақтық комиссия төрағалары дауыс беру күніне дайындық, азаматтарды ақпараттандыру және кейбір учаскелерде дауыс беру уақытының өзгеруі туралы қабылданған шаралар жайында баяндады.
Орталық референдум комиссиясының төрағасы Нұрлан Әбдіров референдумға дайындық барысын халыққа кеңінен жеткізудің маңыздылығын атап өтті.
Референдумға дайындық пен оны өткізу туралы толық әрі нақты ақпарат алу үшін Орталық референдум комиссиясы ақпараттық материалдар (бейне, аудиороликтер, плакаттар және әдістемелік құралдар) әзірледі. Сонымен қатар, азаматтарды қосымша хабардар ету үшін SMS-хабарламалар және мобильді банктерде PUSH-хабарламалар жіберу жоспарланған. Бұл жұмыс дауыс беру күніне дейін жалғасады.
Нұрлан Әбдіров сондай-ақ республикалық референдумға қатысты қоғамдық пікірге сауалнама жүргізудің заңнамалық талаптарын да атап өтті. Сайлау және референдум туралы заңдарға сәйкес, дауыс беру күніне дейінгі бес күн ішінде және дауыс беру күнінде референдум нәтижелері туралы қоғамдық пікірді, болжамдарды немесе басқа зерттеулерді бұқаралық ақпарат құралдарында немесе интернет платформаларда жариялауға тыйым салынатынын еске салды.