Жас жігіт балғамен тас шағып жатқан сәтте, тас сынығы жоғары жылдамдықпен көзіне тиіп, бірнеше қабықшаны тесіп өткен, – деп хабарлайды aqshamnews.kz тілшісі.
Офтальмологтарды күрделі әрі зертханалық дәлдікті талап ететін нәзік жұмыс күтіп тұрды: жарақат өте ауыр болып шықты — қасаң қабық, көз бұршағы, нұрлы қабық және көздің терең құрылымдары зақымдалған еді.
Офтальмологтар көзді және барынша мүмкін болған көру қабілетін сақтап қалу мақсатында зақымдалған құрылымдарды кезең-кезеңімен қалпына келтірді.
«Жарақат өте ауыр болды: тас сынығы көздің ішіне терең еніп кеткен. Біз күрделі көпжақты ота жасадық: қабықшаны тігіп, жарақаттан пайда болған катарактаны алып тастадық, көз бұршағын бекітіп, нұрлы қабыққа пластика және витрэктомия жасадық. Ота барысында сынықты тауып, алып шықтық, содан кейін көздің құрылымын сақтау үшін силикон майын енгіздік», — деп атап өтті офтальмология бөлімшесінің меңгерушісі Гүлзат Әбдірайымова.
Бұл жағдай таспен және басқа да қатты материалдармен жұмыс істеу кезінде көз жарақаттарының қаншалықты қауіпті болуы мүмкін екенін тағы бір рет дәлелдейді.
Мұндай жұмыстарды орындау кезінде қорғаныш көзілдірігін кию міндетті.