Оралда дәрігерлер 12 жастағы қыздың асқазанынан жарты келіге жуық шаш алып шықты, деп хабарлайды Aqshamnews.kz тілшісі.
Батыс Қазақстан облысындағы медицина қызметкерлері сирек әрі күрделі жағдаймен бетпе-бет келді. Бірнеше ай бойы іштің ауыруы, тәбеттің төмендеуі мен әлсіздікке шағымданған қызды тексеру барысында оның асқазанынан тығыздалған бөгде зат — шаш массасы табылған.
Мамандардың айтуынша, бұл жағдай трихобезоар деп аталады. Ол трихотиломания (шаш жұлу) мен трихофагия (шаш жеу) секілді психологиялық ауытқулардың салдарынан дамиды.
Қыздың ата-анасы бастапқыда белгілерге мән бермегенімен, қыздың жағдайы нашарлай бастаған соң, оны шұғыл түрде ауруханаға жеткізген. Дәрігерлер ота жасап, оның асқазанынан шамамен 500 грамм шашты алып шықты. Операция сәтті өтті. Қазір пациенттің жағдайы бірқалыпты.
Медицина қызметкерлерінің айтуынша, мұндай жағдайлар өте сирек кездеседі. Егер дер кезінде анықталып, қажетті көмек көрсетілмесе, бұл өмірге қауіп төндіретін асқынуларға алып келуі мүмкін. Қызға алдағы уақытта медициналық бақылаумен қатар, психологиялық қолдау да қажет болады.