Сарыағаш аудандық білім бөліміне қарасты №71 жалпы білім беретін мектебі ұлттық тәрбие мен құндылықтарды оқушылар арасында насихаттауға ерекше көңіл бөлуде. Мектеп ұжымы ұлттық ойындарды қайта жаңғыртып, балалардың тәрбиесіне айрықша мән беріп отыр, деп хабарлайды aqshamnews.kz
Осы мақсатта мектептің ұстаздары оқушылардың қоңырау уақытын тиімді әрі қызықты өткізу үшін ерекше бастама көтерді. Олар асық ойнау дәстүрін енгізіп, ұлттық тәрбиеге негізделген ойындарды үзіліс кезінде балалармен бірлесе ойнауды ұсынды. Бұл әдіс, бір жағынан, оқушылардың денсаулығын нығайтуға, екінші жағынан, ұлттық мәдениетке деген сүйіспеншілікті арттыруға көмектеседі.
Мектеп директоры үзіліс кезінде оқушылармен бірге асық ойнап, балаларға ұлттық ойындардың маңызы мен олардың тәрбиелік мәні туралы айтады. Осылайша, мектебіміз ұлттық құндылықтарды жаңғырту, балаларды бірлікке, ынтымаққа тәрбиелеу мақсатында ауқымды жұмыстар атқарып отыр.
Бұл бастама оқушыларға тек қана ойын түрінде емес, рухани жағынан да тәрбие береді, олар ұлттық ойындар арқылы көшпелі халықтың мәдениетін, тарихын тереңірек түсіне бастайды.