Бұл азаматтардың ісі бойынша мемлекеттік адвокат жұмыс істеп жатыр
Оңтүстік Кореяға заңсыз кірді деп күдікке ілінген Қазақстанның екі азаматының ісі сотқа жолданды. Бұл туралы Сыртқы істер министрлігінің ресми өкілі Айбек Смадияров мәлім етті, деп хабарлайды Almaty-akshamy.kz ҚазАқпаратқа сілтеме жасап.
«Кореядағы біздің азаматтармен елміздің консулы кездесті. Уақытша тергеу изоляторында ұстау бойынша олардың шағымдары жоқ. Ұсталған адамдардың туыстарымен тұрақты байланыстамыз. Прокуратура істі сотқа жолдады. Соттың алғашқы отырысы мамыр айының ортасында өтуі мүмкін», - деді А. Смадияров елордадағы баспасөз мәслихатында тілшілер сұрағына жауап бере отырып.
Оның айтуынша, бұл азаматтардың ісі бойынша мемлекеттік адвокат жұмыс істеп жатыр.
Еске салайық, наурыздың соңында екі отандасымыз Оңтүстік Кореяға кіруге тыйым салынғанына қарамастан аталған елге заңсыз аяқ басқаны туралы хабарлаған едік.
10 сәуір күні Оңтүстік Кореяға заңсыз кірген жерлестеріміз тергеу изоляторында қамауда отырғаны белгілі болды.