Онкогинекологиялық аурулар бүкіл әлем бойынша әйелдер өлімінің негізгі себептерінің бірі болып қала береді.
Бұл аурулардың ең басты қаупі - бастапқы кезеңдерде аурудың ешбір белгілерсіз өтуі. Әйел өзін жақсы сезінеді, әдеттегі өмір салтын ұстанады және ағзасында елеулі өзгерістер болып жатқанын тіпті сезбейді де.
Алматы онкологиялық орталығының онкогинекология бөлімінің меңгерушісі, PhD докторы Райхан Болатбекова атап өткендей: гинекологқа үнемі барып тұру - тиімді профилактиканың негізі. Қарапайым тексерулер - дәрігердің қарауы, онкоцитологияға жағынды талдау немесе жамбас мүшелерінің ультрадыбыстық зерттеуі - ісік алды өзгерістерді немесе ісікті ерте кезеңде анықтауға мүмкіндік береді, ал бұл кезде емдеу ең тиімді болады.
«Аурудың ерте кезеңінде дәрігерге жүгіну - денсаулықты ғана емес, өмірді де сақтап қалуға мүмкіндік береді. Ауру неғұрлым ерте анықталса, сәтті емделу ықтималдығы соғұрлым жоғары», - дейді Райхан Болатбекова.
Оның айтуынша, 40 жастан асқан әйелдер мен қауіп факторлары бар (тұқым қуалайтын бейімділік, созылмалы қабыну аурулары немесе жыныстық өмірдің тұрақсыздығы) әйелдер өз денсаулығына ерекше назар аударуы қажет. Мұндай науқастар үшін профилактикалық тексерулер тұрақты түрде жүргізілуі тиіс.
Райхан Болатбекова 30 бен 70 жас аралығындағы, онкопатология бойынша динамикалық бақылауда тұрмайтын әйелдерге скрининг жүргізілетінін еске салады. Тексеруден өту үшін тіркелген емханаға жүгіну жеткілікті - ондағы скрининг кабинеттері қызмет көрсетеді. Өзімен бірге жеке куәлік болуы қажет.
Мысалы, биылғы жылдың алғашқы жартыжылдығында Алматы қаласында жатыр мойны обырына байланысты 46 мыңнан астам әйел тексеруден өткен. 20 науқаста жатыр мойны ісігі алғаш рет анықталған, оның 80%-ы I сатыда - бұл кезде емдеу нәтижесі аса тиімді болады. Сонымен қатар, қатерлі ісікке дейінгі жағдайлардың 411 жағдайы анықталды.
«Профилактикалық тексерулер - әрбір әйелдің әдетіне айналуы тиіс. Себебі бұл - тек денсаулыққа деген қамқорлық қана емес, өмірді сақтап қалудың да мүмкіндігі», - деп қорытындылады маман.