Қазақстан тәуелсіздік алған сәттен бастап небәрі 33 жасқа толған жас мемлекет. Бірақ жасына қарамастан, біздің елімізде үлкен және өршіл жоспарлар жүзеге асып келеді.
Қоғам талқысындағы бүгінгі күннің өзекті мәселелерінің бірі – АЭС салу. Бұл мәселеде жастардың да пікірімен санасып, ой бөлісуді жөн санағандарыңыз үшін рахмет айтамын.
Қазіргі заманғы атом электр станцияларын ел үшін энергия өндірудің негізгі көзі деп және оны қауіпсіз түрде «жасыл энергетика» деп атауға болады. Өйткені, атом электр станциялары – әлемдегі электр энергиясының маңызды көздерінің бірі. АЭС арқылы көптеген елдер экономикалық және әлеуметтік дамудағы негізгі мәселелерін шешіп жатыр. Мәселен, соңғы уақытта елімізде электр қуатының жетіспеушілігінен желдеткіштердің өшіп қалып жататын жағдайлар жиілеп кеткенін білеміз. Менің түсінігімде өз қызметі үшін көмір немесе газды пайдаланатын ЖЭО сияқты баламалы электр энергиясын өндірушілермен салыстырғанда, АЭС энергия тиімділігі бойынша абсолютті көшбасшы бола алады. Оның артықшылықтары көп, мәселен, экологиялық таза энергия: Атом электр станциялары климаттың өзгеруінің негізгі себебі болып табылатын көмірқышқыл газы (СО2) сияқты парниктік газдарды атмосфераға шығармайды. Олар іс жүзінде ауа мен судың ластануына ықпал етпейді, бұл қоршаған ортаға әсерді азайтады.
Жалпы, атом электр станциясы, бұл өте жоғары технологиялық және сенімді кешен, оған заманауи жабдықтар, жоғары білікті кадрлар және ең бастысы, бұл қауіпсіздіктің заманауи тәсілі. Сондықтан АЭС салу біздің экономикамыз үшін ауыр және орта өнеркәсіптің дамуына жаңа серпін береді деп ойлаймын.