Денсаулық сақтау министрі Ақмарал Әлназарова Қазақстан азаматтары міндетті әлеуметтік медициналық сақтандыру (МӘМС) үшін төлеген қаражат адам қайтыс болған жағдайда немесе елден көшіп кеткенде қайда кететіні туралы сұраққа жауап берді, - деп хабарлайды Аqshamnews.kz тілшісі.
Брифингте "Бізден міндетті түрде ұсталып жатқан бұл жарналар мұра болып қалмайды, ал зейнетақы жинағын (туыстары – ред.) мұра ете алады. Егер адам шетелге көшіп кетсе немесе қайтыс болса, бұл миллиардтарға кім ие болады?" деген сұрақ қойылды.
Министр Әлназарованың айтуынша, зейнетақы мен сақтандыру жарнасының айырмашылығын түсіндірді.
"Бірыңғай жинақтаушы зейнетақы қорында жинақтау жүйесі бар, оны кеңірек қолдануға болады. Ал сақтандыру жарналары сақтандыру жарналары ретінде қарастырылады. Кез келген сақтандыру түрі секілді сіз жарна төлейсіз, бірақ оған тек сақтандыру жағдайы қажет болғанда иелік етесіз. МӘМС контекстінде бұл - сырқаттану, шұғыл емдеу қажеттілігі секілді жағдайлар", – деді Ақмарал Әлназарова.
Министрдің айтуынша, Медициналық сақтандыру қорында жиналған барлық қаражат емдеуге, алдын алу шараларына – яғни, 20 миллион қазақстандыққа медициналық қызмет көрсетуге бағытталады.
"Негізгі принцип – дені сау адам ауырып қалған адам үшін, бай адам кедей адам үшін төлейді. Бұл – қор құрылған сәттен бастап көзделген ұжымдық жауапкершілік. Қор бұл ұстанымды бүгінде кезең-кезеңімен жүзеге асырып келеді", – деп түйіндеді министр.