Коронавирус инфекциясының жаңа штамының пайда болуына орай елімізде 3 желтоқсаннан бастап шектеу іс-шаралары күшейеді. Бұл туралы Үкімет отырысында мәлім болды, деп хабарлайды almaty-akshamy.kz
ҚР Денсаулық сақтау бірінші вице-министрі Марат Шорановтың айтуынша, коронавирустық инфекцияның «Омикрон» штамының жаңа нұсқасының пайда болуына байланысты, оны ел аумағына әкелуге жол бермеу мақсатында ведомствоаралық комиссияда осы жылдың 3 желтоқсанынан бастап мынадай шектеу іс-шараларын енгізу туралы шешім қабылданды.
- Бірқатар Африка елдерінің азаматтарына Қазақстанға сапар шегуіне шектеу қойылмақ. Атап айтсақ, Оңтүстік Африка, Ботсвана, Лесото, Намибия, Зимбабве, Мозамбик, Мадагаскар және т.б. елдердің азаматтары үшін Қазақстанның шекарасы жабылады.
- Вирустың жаңа штамынан сақтану мақсатында «омикрон» анықталған елдерден келетін азаматтардың вакцина алғанына қарамастан, міндетті түрде ПТР тест анықтамасы талап етіледі. Бұл елдердің қатарында Израиль, Чехия, Нидерланд, Бельгия, Ұлбыритания, Италия, Германия, Австралия, Канада және Египет бар. Оған қоса, ведосмтвоаралық комиссияның шешімімен аталған елдерден ұшып келген азаматтар бұдан былай жеті күндік үй карантиніне жатқызылады.
- Коронавирустың "омикрон" штамының алдын алу үшін Египеттен келетін әуе рейстері уақытша тоқтатылады.
Айта кетейік, санитарлық-эпидемиологиялық комитетінің департаменттері, шетелден келген азаматтар туралы ақпаратты жергілікті атқарушы органдарға уақтылы беруді, ал әкімдіктер бұл тұлғаларды емхана деңгейінде қашықтықтан бақылауды қамтамасыз етуі қажет.