Қазақстан Республикасының Премьер-министрі Олжас Бектенов Air Products компаниясының (АҚШ) Еуропа және Африка өңірлері бойынша президенті Иво Болспен кездесу өткізді, – деп хабарлайды aqshamnews.kz тілшісі.
Онда өнеркәсіптік кооперацияны дамыту, озық технологияларды енгізу және газ химиясы саласындағы бірлескен инвестициялық жобаларды жүзеге асыру перспективалары талқыланды.
Air Products – газ индустриясының халықаралық көшбасшысы, ол әлемнің 50-ден астам елінде жұмыс жүргізеді.
Кездесу барысында газ химиясы, көмір химиясы, сутегі энергетикасы саласындағы ынтымақтастықты дамытуға, сондай-ақ отандық металлургия өндірістерінің тиімділігін арттыруға ерекше назар аударылды.
Олжас Бектенов Қазақстан жаңа сапа экономикасына дәйекті түрде көшіп келе жатқанын, мұнда негізгі басымдықтар технологиялық жаңғырту, технологиялар трансфері және заманауи өндірістер құру болып отырғанын атап өтті.
«Біз жетекші халықаралық компаниялармен серіктестікке үлкен мән береміз және озық технологияларды дамыту бағытындағы өзара тиімді ынтымақтастыққа әрдайым ашықпыз. Қазақстан айтарлықтай ресурстық әлеуетке ие және жаңа индустриялық салаларды қалыптастыру бойынша жүйелі жұмыс жүргізіліп келеді», — деп атап өтті Олжас Бектенов.
Air Products компаниясының Еуропа және Африка өңірлері бойынша президенті Иво Болс Қазақстанмен әріптестікті кеңейтуге және экономиканың басым секторларында бірлескен бастамаларды жүзеге асыруға қызығушылық танытты.
Кездесу қорытындысы бойынша Премьер-министр «Самұрық-Қазына» ҰӘҚ» АҚ басқарма төрағасына Air Products компаниясымен келешегі зор бірлескен жобалардың нақты пысықталуын жандандыруды тапсырды.