Премьер-министр Олжас Бектенов электр мопедтері мен самокаттарды қолдануға қатысты бақылауды күшейтудің маңыздылығына тоқталды.
Оның айтуынша, бұл көлік түрлері қоғамдық көліктерге түсетін жүктемені белгілі бір деңгейде азайтқанымен, жол ережелерін сақтамау салдарынан тұрғындарға қолайсыздық туғызып, қозғалыс қауіпсіздігіне қатер төндіріп отыр.
- Жыл басынан бері электросамокаттардың қатысуымен 360-тан астам жол-көлік оқиғасы тіркелген.
- Мемлекет басшысы Жолдауында осы өзекті мәселеге ерекше назар аударған болатын.
- Әлемдік тәжірибе көрсеткендей, бірқатар елдерде мұндай көліктерге толық тыйым салу немесе қатаң шектеулер енгізу шаралары қабылданған.
Мәселен, Парижде 2023 жылдың қыркүйегінен бастап самокаттарды жалға алу тоқтатылып, тек жеке меншік көлікті пайдалануға рұқсат етілген. Мадридте де өткен жылдың қазанынан осындай шешім қабылданды. Ал Ұлыбританияда әрбір электросамокатқа мемлекеттік нөмір беріліп, оны тек жүргізуші куәлігі бар азаматтар ғана басқара алады.
«Ішкі істер министрлігі заңнамаға тиісті түзетулерді жедел енгізуі тиіс. Бүгін біз осы мәселе бойынша Үкіметтің қорытындысын қабылдаймыз», — деді Олжас Бектенов.
Сонымен бірге, ол адам өмірі мен денсаулығын қорғау күре жолдардағы қауіпсіздікті қамтамасыз етудің басты бағыты болып қала беретінін атап өтті.