27-28 қарашада Астанада өтетін Ұжымдық қауіпсіздік туралы шарт ұйымы (ОДКБ) отырысында маңызды құжат қабылданады. Бұл туралы ОДКБ Бас хатшысы Иманғали Тасмағамбетов Беларусьтің СТВ телеарнасына берген сұхбатында мәлімдеді.
Тасмағамбетовтің айтуынша, Ұжымдық қауіпсіздік кеңесі Тәжікстан мен Ауғанстан шекарасындағы қауіпсіздікті қамтамасыз етуге бағытталған арнайы мемлекетаралық бағдарламаны бекітуді жоспарлап отыр.
«Ауған мәселесі – ОДКБ-ның маңызды бағыттарының бірі. Сіздер бұл жағдайдың маңыздылығын жақсы түсінесіздер. Орталық Азия үшін Ауғанстан тұрақтанып, бейбіт бағытқа бет бұрғанымен, бұл елде әлі де көптеген террористік ұйымдар бар. Бұл, сөзсіз, өте күрделі мәселе», – деп атап өтті Иманғали Тасмағамбетов.
Бас хатшының айтуынша, жаңа бағдарлама ұйымға мүше елдердің шекарадағы жағдайды бірлесіп реттеуіне және аймақтың қауіпсіздігін нығайтуға мүмкіндік береді.
Аталған құжат ОДКБ елдерінің Ауғанстан аумағынан келетін қауіп-қатерлерді алдын алу және Орталық Азияда тұрақтылықты қамтамасыз ету бағытындағы ынтымақтастығының маңызды қадамы болмақ.