Қазіргі таңда атом электр станциясын (АЭС) салу мәселесі тек Қазақстанда ғана емес, әлемнің көптеген елдерінде қаралып, маңызды шешімдер қабылдануда.
Біздің де жылу электр станцияларымыздың көбі ескірген. Екібастұздағы жағдайды еске түсірсек, қыстың қатал күндерінде халық жылусыз қалды. Осы себепті, елдегі электр тапшылығын шешу үшін атом электр станциясын салу өзекті мәселеге айналып отыр.
Қуат көздеріне деген сұраныс жыл өткен сайын артып келеді. Экономика дамып, халықтың саны өскен сайын энергияның тапшылығы қатты сезілуде.
Әлемнің дамыған және дамушы 30 мемлекетінде 200-ден астам атом электр станциясы жұмыс істеп тұр, көршілес Ресейде де 36 АЭС бар. Бұл – болашақтағы электр тапшылығын болдырмау үшін маңызды қадам.
6 қазанда осы мәселеге қатысты жалпыхалықтық референдум өтеді. Бұл – халықтың тікелей қатысуымен қабылданатын шешім. Әр азамат ойланып, дұрыс шешім қабылдауы қажет. Референдумның қорытындысы еліміздің болашағына әсер ететінін естен шығармауымыз керек. Халықтың еркі мен қалауы – басты мәселе. Бұл саяси шешімнің мәні осында.