Наурызнама мерекелік апталығы аясында Қазақ ұлттық аграрлық зерттеу университетінде Ұлттық спорт күніне орай студенттер арасында жарыстар өтті.
Университет стадионында жастар садақ ату, қазақ күресі, асық ату, тоғызқұмалақ, армрестлинг сияқты дәстүрлі спорт түрлерінен өзара сайысқа түсті.
ҚазҰАИУ ректорының орынбасары Айтжан Әбдіров те жарысқа қатысып, садақ тартып, нысанаға дөп тигізуге талпынды. Ол студенттермен бірге кезекке тұрып, ұлттық спорт түрлерін өз көзімен тамашалап, кейін өз ойымен бөлісті.
– Барша қазақстандықтарды Наурыз мерекесімен құттықтаймын! Ұлттық спорт күнін ұйымдастырудағы мақсатымыз – студенттерімізге дәстүрлі ойындар арқылы Ұлы дала рухын сезіндіру. Ұлттық мерекелер кезінде ойналатын қызықты әрі пайдалы ойындарды жаңғырту арқылы біз өз болашағымызға сенімді қадам басамыз. Ауыл шаруашылығы мен мал шаруашылығы саласында қызмет ететін болашақ мамандарға тек ғылыми білім ғана емес, сонымен қатар ұлттық мәдениетті тану да аса маңызды. Себебі, халқымыз ежелден бері күш пен төзімділікті жоғары бағалаған. Ал спортпен айналыспай, дене тәрбиесімен айналыспай, қазіргі заман жастарының өз орнын табуы қиын, – дейді Айтжан Әбдіров.
