Бүгін Наурызнама онкүндігінің үшінші күні — Мәдениет және ұлттық салт-дәстүр күніне орай Алматыны би думаны кернеді, – деп хабарлайды aqshamnews.kz тілшісі.
Мегаполистегі жетекші театрлардың артистері көктемнің жаңаруын айшықтайтын мерекемен қала тұрғындарын құттықтау үшін ауқымды флешмобқа бірікті.
Бұл үлкен перформанстың бастамашысы — Наталия Сац атындағы театр. Іс-шара Қазақстан Республикасы Мәдениет және ақпарат министрлігі мен Алматы қаласы әкімдігінің ресми қолдауымен ұйымдастырылды.
Айта кетейік, қазіргі уақытта қала әкімдігі аталған театр ғимаратында ауқымды қайта жаңғырту жұмыстарын жүргізіп жатыр. Бұл туралы жақында Almaty TV телеарнасындағы «Архитектор» бағдарламасының бір шығарылымында кеңінен айтылған болатын.
Жарқын флешмобқа сондай-ақ мына театр ұжымдары қатысты:
- Ғ. Мүсірепов атындағы Қазақ мемлекеттік академиялық балалар мен жасөспірімдер театры;
- М. Лермонтов атындағы Мемлекеттік академиялық орыс драма театры;
- Қ. Қожамияров атындағы Республикалық мемлекеттік академиялық ұйғыр музыкалық комедия театры;
- Республикалық мемлекеттік академиялық корей музыкалық комедия театры;
- Республикалық академиялық неміс драма театры.
Түрлі шығармашылық мектептер, әртүрлі этностар мен стильдер тоғысқанымен, барлығын бір ырғақ пен ортақ рух біріктірді. «Қара жорға» биі шекара атаулыны жойып, бүкіл қаланы біртұтас мерекелік сахнаға айналдырды. Ол достықтың, ата-баба мұрасына деген құрметтің және Алматы мәдени кеңістігінің ажырамас бірлігінің жарқын символына айналды.
Бір ерекшелігі, флешмобқа кәсіби бишілер емес, драма театрларының актерлері қатысты. Олар небәрі бір аптаның ішінде дала биінің ырғағын шебер меңгеріп, әрбір қимылына актерлік шеберлік пен ұлттық дәстүрге деген құрметті дарыта білді.
ҚР «Салтанат» мемлекеттік би ансамблі бірегей хореография әзірлеп, флешмобтың кәсіби деңгейде өтуіне үлес қосты.
Жобаның жүзеге асуына Almaty TV телерадиокомпаниясы да ерекше үлес қосты. Арна хабар таратушы ғана емес, негізгі ақпараттық серіктес әрі идеялық қолдаушы ретінде түсірілім жұмыстарын ұйымдастырып, медиялық қолдау көрсетті. Соның арқасында мерекелік көңіл күйді миллиондаған көрермен экран арқылы сезіне алды.
Келе жатқан Әз-Наурыз мейрамы құтты болсын! Көктем әр шаңыраққа жылу, береке мен шабыт әкелсін!