Алматының Наурызбай ауданында 5 445 жаңа жұмыс орны құрылды, - деп хабарлайды Aqshamnews.kz.
Бұл жылдық жоспардың 97,9 пайызы, былтырғы көрсеткіштен едәуір жоғары. Бұл туралы Наурызбай ауданының әкімдігі хабарлады.
Аудан экономикасы барлық негізгі сала бойынша тұрақты дамып келеді. Өнеркәсіп өндірісінің көлемі 13,8 млрд теңгеге жетті, бөлшек сауда көлемі 40,5 млрд теңгеге дейін өсті, ал көтерме сауда көрсеткіші 5 есеге жуық артып, 20 млрд теңге болды.
Шағын және орта бизнес субъектілерінің саны 31,3 мыңға жетті, оның 29 мыңнан астамы белсенді жұмыс істейді. Негізгі капиталға салынған инвестиция 126,6 млрд теңгеге дейін өсіп, 183,6 мың шаршы метр тұрғын үй пайдалануға берілді.
Құрылыс жұмыстарының көлемі 64 млрд теңгені, ал аудан бюджетінің кірісі 46 млрд теңгеден асты. Бұл жоспардан 27,5 пайызға жоғары көрсеткіш.
«Бұл нәтижелер Республикa күніне орай Наурызбай ауданының жүйелі дамуының көрсеткіші. Жаңа нысандар мен шағын және орта бизнес жобаларының ашылуы жұмыспен қамтуды арттыруға, тұрғындардың өмір сүру сапасын жақсартуға және аудан экономикасының әлеуетін нығайтуға мүмкіндік береді», – деді аудан әкімдігінің өкілдері.