Алматы қаласы, Наурызбай ауданының Инновациялық шығармашылық орталығында «AMANAT» партиясының «Құқықтық көмек» жобасы аясында тұрғындардың өзекті мәселелерін тиімді шешуге бағытталған маңызды іс-шара – мобильді қоғамдық қабылдау өтті.
Іс-шараның негізгі мақсаты – тұрғындардың өмірінде туындаған түйткілді мәселелерді тікелей тыңдап, оларға жедел және білікті кеңес беру арқылы нақты көмек көрсету. Қабылдауға Алматы қалалық мәслихатының депутаты Болат Ибрагимұлы, «AMANAT» партиясының Наурызбай аудандық филиалының төрағасы Баймұрат Жамбылов, сондай-ақ мемлекеттік мекемелердің өкілдері мен тәжірибелі заңгерлер қатысты.
Қоғамдық қабылдау кезінде аудан тұрғындары түрлі сұрақтармен жүгінді. Көтерілген мәселелердің басым бөлігі әлеуметтік-экономикалық сипатта болды. Атап айтқанда, азаматтар несиелік міндеттемелерін өтеу тәртібі, медициналық мекемелерге тіркелу, банктік есепшоттардың бұғатталуы, сондай-ақ тұрғын үймен қамтамасыз ету және басқа да әлеуметтік маңызы бар мәселелер бойынша көмек сұрады.
Келушілердің әрбір өтініші жеке қаралып, заң аясында нақты жауаптар мен кеңестер берілді. Қажет болған жағдайда, кейбір мәселелер бойынша жауапты органдарға ресми сауалдар жолданатыны айтылды. Заңгерлер мен сала мамандары тұрғындарға құқықтық тұрғыдан бағыт-бағдар ұсынып, туындаған жағдайдан шығу жолдарын түсіндірді.
Депутат Болат Ибрагимұлының айтуынша, мұндай қоғамдық қабылдаулар халықпен ашық диалог орнатуға, олардың мұң-мұқтажын жедел жеткізіп, шешім қабылдау үдерісін жеңілдетуге зор мүмкіндік береді:
«Біз үшін ең маңыздысы – тұрғындардың сенімі. Олар өз мәселесімен кімге жүгінерін біліп, нақты көмек алуы қажет. Партияның қолға алған бұл жобасы осы бағытта үлкен нәтижелерге жетіп келеді», – деді депутат.
Ұйымдастырушылардың пікірінше, мобильді қоғамдық қабылдаулар «AMANAT» партиясының халықпен тікелей байланыс орнатудағы тиімді құралына айналды. Жоба аясында еліміздің түкпір-түкпірінде осындай қабылдаулар жалғасын табуда. Бұл бастама партияның халықпен ашық әрі есеп беретін саяси ұйым екенін дәлелдейді.